Өңірдің құтқарушылары мен әлеуметтік қызметтері азаматтық қорғау жүйесін ерекше қажеттіліктері бар адамдар үшін барынша қолжетімді әрі инклюзивті ету мақсатында күш біріктіруде.
Маңғыстау облысының Төтенше жағдайлар департаментінде қауіп-қатер туындаған кезде мүгедектігі бар азаматтарды қорғау мәселелеріне арналған ведомствоаралық кездесу өтті. Дөңгелек үстел басына азаматтық қорғау органдарының, облыстық Жұмыспен қамтуды үйлестіру және әлеуметтік бағдарламалар басқармасының мамандары, сондай-ақ оңалту орталығы мен әлеуметтік мекемелердің басшылары жиналды.
Қатысушылар шұғыл әрекет ету алгоритмдерін жүріп-тұруы шектеулі тұрғындардың нақты мүмкіндіктеріне бейімдеу жолдарын егжей-тегжейлі талқылады. Атап айтқанда, есту және көру қабілеті бұзылған жандарға дабыл сигналдарының қолжетімділігі, қауіпсіз эвакуациялау және уақытша орналастыру пункттерін медициналық әрі әлеуметтік сүйемелдеуді ескере отырып жабдықтау мәселелері сөз болды.
Әлеуметтік орталықтардың өз дайындығына ерекше назар аударылды: олардың қызметкерлері мен қызмет алушылары өрт және өзге де ТЖ кезіндегі іс-қимылдарды тұрақты түрде пысықтап отыруы тиіс, ал эвакуациялық жолдар толықтай ашық болуы қажет. Сонымен қатар ведомстволар құтқарушылардың атаулы көмектің қай жерде қажет болатынын алдын ала білуі үшін жедел деректер алмасуды жолға қоюға уағдаласты.
Кездесу қорытындысы бойынша нақты шаралар қабылданды - әзірленген барлық ұсыныстар халықты қорғаудың үйлесімді жүйесін қалыптастыруға арналған бірлескен іс-шаралар жоспарына енгізілетін болады.
Маңғыстау облысы ТЖД