Объектілердің терроризмге қарсы қорғалуы — бір реттік іс-шара да, тек тексерулерден өту үшін әзірленетін құжаттар жиынтығы да емес.
Бұл — басты мақсаты қатерлердің алдын алу және адамдардың өмірі мен денсаулығын қорғау болып табылатын тұрақты әрі жүйелі жұмыс.
Қазіргі жағдайда террористік тұрғыдан осал объектілер санатына жататын ұйымдардың басшылары мен қызметкерлері арасында қауіпсіздік мәдениетін қалыптастыру ерекше маңызға ие.
Қажетті техникалық құралдар болған күннің өзінде қорғаныс жүйесінің тиімділігі көбіне персоналдың даярлық деңгейіне және белгіленген талаптарға деген көзқарасына байланысты.
Формалды көзқарас нұсқамалар әдеттегі рәсімге айналып, қауіпсіздік шаралары тек әкімшілік міндет ретінде қабылданған кезде байқалады.
Мұндай көзқарас қызметкерлердің төтенше жағдайларда әрекет етуге дайындығына кері әсер етуі мүмкін.
Профилактикалық жұмыстың тиімділігін арттыру үшін сабақтарды өткізудің өзіне ғана емес, олардың практикалық маңызына да назар аудару қажет.
Қызметкерлер ықтимал қауіп туындағанда өздерінен қандай әрекеттер күтілетінін, ақпаратты кімге жеткізу керектігін және белгіленген нұсқаулықтарды орындаудың неліктен түбегейлі маңызды екенін түсінуі тиіс.
Ұйым басшылығына ерекше жауапкершілік жүктеледі. Дәл басқару деңгейінде қауіпсіздікті қамтамасыз ету тәсілдері қалыптастырылып, персоналды даярлау ұйымдастырылады және көзделген іс-шаралардың орындалуына бақылау жасалады.
Қазақстанда ТТО объектілерін терроризмге қарсы қорғауды ұйымдастыруға қойылатын талаптар жүйелі түрде жетілдіріліп келеді.
Атап айтқанда, Қазақстан Республикасы Үкіметінің 2026 жылғы 9 сәуірдегі № 252 қаулысымен бекітілген кестеге сәйкес практикалық және теориялық сабақтарды жылына кемінде екі рет өткізу кезеңділігі белгіленген.
Мұндай тәсіл қызметкерлердің ықтимал қатерлерге уақтылы ден қоюға дайындығын нығайтуға бағытталған.
Сонымен бірге профилактикалық жұмыстың сапасы өткізілген іс-шаралар санымен ғана өлшенбейді.
Сабақтардың қызметкерлердің хабардарлығын арттыруға, қауіпсіздікке жауапкершілікпен қарауын қалыптастыруға және қажетті практикалық дағдыларды бекітуге ықпал етуі маңызды.
Ұйым ішіндегі ашық коммуникация да елеулі рөл атқарады. Қызметкер байқалған тәртіп бұзушылық немесе ықтимал қауіпті жағдай туралы дер кезінде хабарлаудың кәсіби жауапкершіліктің көрінісі екенін түсінуі керек.
Терроризмге қарсы қорғалу дәйекті жұмысты, ұдайы жетілдіруді және әр адамның саналы түрде қатысуын талап етеді.
Шынайы қауіпсіздік мәдениеті талаптар есеп беру үшін емес, адам өмірін сақтау үшін орындалған кезде қалыптасады.
Материалды ҰҚК Астана қаласы бойынша департаментінің ТҚО басқармасы дайындаған