Зиянды еңбек жағдайларында жұмыс істеген азаматтарға арнаулы кәсіптік мемлекеттік жәрдемақы тағайындау тәртібі Қазақстан Республикасының әлеуметтік заңнамасында көзделген.
Арнаулы кәсіптік мемлекеттік жәрдемақы арнаулы әлеуметтік төлемнің құрамдас бөлігі болып табылады. Оны тағайындау үшін азамат 55 жасқа толуы және оның пайдасына кемінде 84 ай (7 жыл) міндетті кәсіптік зейнетақы жарналары төленуі қажет.
Арнаулы әлеуметтік төлем төрт көзден жүзеге асырылады. Оның ішінде республикалық бюджеттен төленетін арнаулы кәсіптік мемлекеттік жәрдемақы қарастырылған. Сонымен қатар, төлем аннуитеттік сақтандыру шарты бойынша сақтандыру төлемінен, жұмыс берушінің қаражаты есебінен төленетін кәсіптік төлемнен және Бірыңғай жинақтаушы зейнетақы қорынан төленетін зейнетақы төлемінен тұрады.
Жәрдемақы проактивті түрде тағайындалады. Бұл үшін жұмысшы зиянды еңбек жағдайларындағы жұмысын тоқтатуы немесе зиянды өндірістік факторлардың әсері жоқ басқа жұмысқа ауысуы тиіс.
Ал зиянды еңбек жағдайларындағы жұмыстан шыққаннан кейін жәрдемақы тағайындауға жүгінген азаматтар тұрғылықты жері бойынша Халыққа қызмет көрсету орталығына өтініш бере алады. Бұл жағдайда төлем республикалық бюджет пен Бірыңғай жинақтаушы зейнетақы қоры есебінен жүзеге асырылады.
Арнаулы кәсіптік мемлекеттік жәрдемақы зиянды еңбек жағдайларында жұмыс істеген азаматтарды әлеуметтік қолдауға бағытталған.