30 қазан мен 1 қараша аралығында Үндістанның Бангалор қаласында барлық жас санаттары бойынша Шотокан каратэ-додан әлем чемпионаты өтті. Халықаралық додада М.Х.Дулати атындағы Тараз университетінің студенттері Гүлжанат Қобланды мен Мәдина Мұрат жоғары нәтиже көрсетіп, алтын медаль иеленді.
Әлемнің үздік спортшылары бақ сынаған чемпионатта қазақстандық студенттер өз санаттары бойынша бірінші орын алып, әлем чемпионы атанды. Осылайша, олар ел қоржынына екі алтын медаль салып, Қазақстанның халықаралық спорт аренасындағы жетістіктерін толықтырды.
Жеңімпаздар – М.Х.Дулати атындағы Тараз университетінің «Білім саласындағы дене мәдениеттік-спорттық қызмет» (6В01421) білім беру бағдарламасының 2-курс студенттері. Олардың халықаралық жарыстағы жетістігі жүйелі дайындықтың, табанды еңбектің және кәсіби спорттық шеберліктің нәтижесі.
«Әлем чемпионатына қатысу біз үшін үлкен жауапкершілік болды. Жарысқа дайындық барысында техникалық және физикалық даярлығымызды жетілдіруге ерекше назар аудардық. Бұл нәтиже – жүйелі жаттығу мен жаттықтырушыларымыздың қолдауының жемісі. Алдағы уақытта да халықаралық жарыстарға қатысып, еліміздің спорттық жетістіктеріне үлес қосуды мақсат етеміз», – деді әлем чемпионы Мәдина Мұрат.
Студенттердің әлемдік деңгейдегі жетістігі жоғары оқу орындарында білім беру мен спорттық даярлықты ұштастырудың маңызын көрсетеді. Сонымен қатар бұл жеңіс жас спортшылардың әлеуетін дамытуға, студенттер арасында бұқаралық спортты кеңінен насихаттауға және жастарды салауатты өмір салтына ынталандыруға үлес қосады.
