Өңірде жылу беру 14 қыркүйектен басталды, ал 28 қыркүйектен бастап көппәтерлі тұрғын үйлер жылуға қосыла бастады. Облыс аумағында жылыту кезеңінің қалай өтіп жатқаны туралы @pavlodar.rsk алаңында энергетика және ТҮКШ басқармасы басшысының орынбасары Күлбаршын Арынова мен «Павлодар жылу желілері» ЖШС директоры Анатолий Моисей айтып берді. Олар жылыту маусымына дайындық аясында 58 қазандықта 100-ге жуық қазанды ауыстыра отырып, күрделі жөндеу жүргізілгенін еске салды. Тағы 418 қазандықта ағымдағы жөндеу жұмыстары орындалды. Мысалы, Железинкада № 2 және № 4 қазандықтар жөнделіп, су жылыту қазандары ауыстырылды және 1,2 шақырым жылу желілері жаңартылды. Ақтоғай және Тереңкөл аудандарында жаңа блокты-модульді қазандықтар орнатылды. Жылыту маусымына барлық 566 білім беру және 286 денсаулық сақтау нысаны дайындалып, қосылды. Бюджеттік ұйымдар үшін 244 мың тонна қатты отын сатып алу көзделген. Мәліметтер ұсынылған сәтте 180 мың тонна немесе жоспарланған көлемнің 74%-ы жеткізілді. Өңірде барлығы 660 мың тонна қатты отын сатып алу жоспарланып отыр, оның 416 мың тоннасы – халықтың қажеттіліктері үшін.
Фото: META AI