Қазақстан Республикасының Республика күні қарсаңында аудандық Мәдениет үйінде еліміздің басты мемлекеттік мерекелерінің біріне арналған салтанатты іс-шара өтті. Мерекелік жиынға жергілікті атқарушы орган өкілдері, еңбек ардагерлері, түрлі сала қызметкерлері, аудан тұрғындары мен құрметті қонақтар қатысты.
Салтанатты рәсім Мемлекеттік Туды алып шығу және Қазақстан Республикасының Мемлекеттік Әнұранын орындаумен басталды. Бұл рәсім еліміздің тәуелсіздігі мен егемендігін, сондай-ақ халықтың бірлігі мен ынтымағын айшықтады.
Іс-шараға қатысушыларға құттықтау сөзін Целиноград ауданы әкімінің орынбасары Жәнібек Толқынбекұлы арнады. Ол өз сөзінде Республика күнінің қазақстандық мемлекеттіліктің қалыптасу тарихындағы айрықша маңызын атап өтіп, ұлттық құндылықтарды сақтау, бірлік пен қоғамдық келісімді нығайту және ұрпақтар сабақтастығын жалғастырудың маңыздылығына тоқталды.
Мерекелік рәсім аясында Қазақстан Республикасы Президентінің Жарлығына сәйкес жеті көпбалалы ана мемлекеттік награда - «Күміс алқа» медалімен марапатталды. Бұл марапат аналардың еңбегіне, бала тәрбиесіне қосқан үлесіне және отбасылық құндылықтарды нығайтудағы рөліне көрсетілген құрметтің белгісі болды.
Ауданның дамуына елеулі үлес қосқан тұрғындарға да ерекше құрмет көрсетілді. Алты азаматқа «Целиноград ауданының Құрметті азаматы» атағы берілді. Олардың көпжылдық адал еңбегі, белсенді азаматтық ұстанымы және туған өлкесінің өркендеуіне қосқан үлесі өскелең ұрпаққа үлгі болары сөзсіз.
Сонымен қатар бірқатар аудан тұрғыны кәсібилігі, жауапкершілігі, қоғамдық өмірге белсенді қатысқаны және Целиноград ауданының әлеуметтік-экономикалық дамуына қосқан елеулі үлесі үшін төсбелгілермен, Құрмет грамоталарымен және Алғыс хаттармен марапатталды.
Әрбір марапат - еңбегімен ел құрметіне бөленген, туған өлкенің өркендеуіне үлес қосып жүрген азаматтарға көрсетілген құрметтің айқын көрінісі. Өйткені еңбекқорлық, ауызбіршілік және ортақ мақсат жолындағы ынтымақ қоғам мен мемлекеттің дамуына берік негіз қалайды.
Салтанатты іс-шара аудандық Мәдениет үйінің шығармашылық ұжымдары дайындаған мерекелік концертпен жалғасты. Әсем әндер мен жарқын өнер көрсетілімдері көрермендерге көтеріңкі көңіл күй сыйлап, залды отансүйгіштік рухқа, туған елге деген мақтаныш пен оның тарихына деген құрметке бөледі.
Республика күні - тарихи маңызы зор мереке ғана емес, сонымен қатар тәуелсіздіктің, бірліктің және Қазақстан халқының ортақ мақсат-мүддесінің символы. Бұл күн бейбітшілік пен келісімнің қадірін түсінуге, әр азаматтың ел болашағы алдындағы жауапкершілігін сезінуге және мемлекетіміздің одан әрі дамуына бірлесе үлес қосуға үндейді.
Посмотреть эту публикацию в Instagram
