23 қазан күні Ақкөл ауылында ауқымды «Таза Қазақстан» экологиялық акциясы өз жалғасын тауып, ауыл тұрғындары мен мекеме қызметкерлері игі іске бір кісідей атсалысты.
Аудан әкімінің орынбасары бекіткен арнайы медиа-жоспарға сәйкес ұйымдастырылған бұл шара қоршаған ортаны қорғаумен қатар, ауыл тіршілігін жақсартуды да көздейді. Акция аясында ауылдағы жұмыстар екі бағытта қызу жүргізілді.
Алдымен, мекеменің нәзік жанды қызметкерлері мен ауыл әйелдері айналаны абаттандыруға белсене кірісті. Олар мекеме маңайын күл-қоқыстан тазартып, күзгі жапырақтарды сыпырып, ауылдың көркіне көрік қосты.
Сонымен қатар, дәл осы күні ауыл үшін ең маңызды мәселелердің бірі – ауыз су жүйесін ретке келтіру жұмыстары қатар атқарылды. Ауданнан арнайы келген білікті мамандар тобы су құбырларын жөндеуге кіріскен сәтте, ауылдың ер азаматтары да шет қалмай, ауыр техникалардың қасында жүріп, қолқабыс берді. Ерлер қауымы құбыр тарту, қазу және бекіту жұмыстарына көмектесіп, ауыз судың ауылға кедергісіз жетуіне өз үлестерін қосты.
«Тазалық – табалдырықтан басталады» демекші, бұл акция тек қоршаған ортаны тазартып қана қоймай, ауыл тұрғындарының ауызбіршілігі мен жанашырлығын тағы бір мәрте дәлелдеді. Тазалық пен игі іс жолындағы мұндай жұмыстар ауданымызда тұрақты түрде жалғаса бермек.
